د چارچۆڤێ چالاکییێن زانستی یێن بەردەوام و ب مەرەما پەرەپێدانا شیانێن ئەکادیمی یێن پشکدارێن خۆلا پێداگۆجی، سەنتەرێ ڕاهێنانا پێداگۆجی و پەرەپێدانا ئەکادیمی ل زانکۆیا زاخۆ، ب هەماهەنگی لگەل سەنتەرێ زمان، ل ڕۆژا دووشەمبی ڕێکەفتی (١٣ی نیسانا ٢٠٢٦) وۆرکشۆپەکێ تایبەت ل ژێر ناڤ و نیشانێن "Reflect to Solve: Learning Diaries Approach" ئەنجامدا.
​ئەڤ وۆرکشۆپە ل ژێر چاڤدێرییا مامۆستا (شلێر مصطفی محمد)، ڕێڤەبەرا سەنتەرێ ڕاهێنانا پێداگۆجی، و ژ لایێ پڕۆفیسۆرێ هاریکار (د. ئیڤان حسن مراد)، ڕێڤەبەرێ سەنتەرێ زمان ل زانکۆیا زاخۆ، بۆ قوتابی و پشکدارێن گەڕا چاردێ (R14) یا خۆلا پێداگۆجی هاتە پێشکێشکرن.
​تەوەرێن سەرەکی یێن وۆرکشۆپێ:
​د ڤێ ڕوینشتنا زانستیدا، ب هویری بەحس ل چەند لایەنێن گرنگ هاتەکرن، ژ وان ژی:
• ​فێربوونا سەردەمیانە: چەوانیا بکارئینانا یاداشتێن فێربوونێ (Learning Diaries) وەک ئامرازەکێ کارا د ناڤ پۆلێ دا.
• ​هزرکرنا ڕەخنەگرانە: ڕۆڵێ ڤێ ڕێبازێ د گەشەپێدانا شیانێن "ڕەخنا ئاڤاکەر" و چارەسەرکرنا ئاریشان ل دەف فێربوویان.
• ​پەرەپێدانا بەردەوام: چەوانیا بکارئینانا ڤێ میتۆدێ ژبۆ کویرترکرنا تێگەهشتنا بابەتێن زانستی و باشترکرنا کوالیتیا فێربوونێ ب شێوەیەکێ بەردەوام.
​ئەڤ وۆرکشۆپە ب گەنگەشە و لێکگۆهارتنا هزر و بۆچوونان د ناڤبەرا پێشکێشکار و پشکداران دا ب دووماهی هات، کو تێدا دوپاتی ل سەر وێ چەندێ هاتەکرن کو ئەڤ جۆرە ڕێبازە دبنە ئەگەرێ بلندکرنا ئاستێ زانستی و نویکرنا پرۆسەیا خواندنێ ل زانکۆیێ.